ମହକିବି ଦିନେ ଫୁଲ ପରିକା

ଲେଖା : ଅନନ୍ତ କୁମାର ସେନାପତି

ଭାରି ଖୁସି ଲାଗେ ଖେଳିବାକୁ ସାଥେ
କଅଁଳ ପାଦରେ ଧାଇଁକି,
ଅବୁଝା ମନ ମୋ ଘୁରି ବୁଲୁଥାଏ
ନୂଆ ସପନଟେ ପାଇଁକି ।

ଖାତିର ନ କରେ କୁହୁଡି କାକର
ଅବା ଖରାତାତି ବରଷା,
ଖେଳୁ ଖେଳୁ ପଥେ ଥକିଯାଏ ଯେବେ
ମାଆର କୋଳଟି ଭରସା ।

ଡରିଯିବି ନାହିଁ ଉଡିବାକୁ ନଭେ
ବଣ ପରବତ ସାଗର,
ଏଇ ହାତେ ମୋର ଜନମମାଟିକୁ
ଗଢ଼ିଦେବି କେତେ ବାଗର ।

କେବେ ଝରିଯିବି ଝରଣା ପରି ମୁଁ
କୁଳୁ କୁଳୁ ଗୀତ ଗାଇକି,
ଭଲ ଲାଗେ ଭାଙ୍ଗି ନୂଆ ଗଢିବାକୁ
ଚପଳ ମନରେ ଥାଇକି ।

ପାଇଲେ ସିନେହ ଫୁଲ ପରି ଫୁଟି
ମହକି ଉଠିବି ମାଟିରେ,
ନିତି ଦେଖେ ଯାହା ସୁନାର ସପନ
କିଏ ବା ପାରିବ କାଟିରେ ।

ଆନର ଓଠରେ ଫୁଟାଇବି ହସ
ଜ୍ଞାନର ଆଲୋକ ଜଳାଇ,
ଯଶ ଗଉରବ ଦିନେ ଏ ମାଟିରେ
ମହକି ଉଠିବ ଖେଳାଇ ।

ବାଣ୍ଠୁପଡା, ରାଜଗାଙ୍ଗପୁର, ସୁନ୍ଦରଗଡ଼
ଫୋନ 7008304225