ମିଳିମିଶି ରଜ ପାଳିବା

ଲେଖା : ଧୀରେନ ମିଶ୍ର

ବଣ ରାଇଜରେ ହୁରିହାଟ ହେଲା
ପାଳନ ହୋଇବ ରଜ
ଯେତେ ପଶୁ ଥିଲେ ଆନନ୍ଦ ମନରେ
ସଭିଏଁ ହୋଇଲେ ସଜ ।
ଭାଲୁ ଯୋଗାଡିଲା ରଶି,
ବାଉଁଶ ହାଣିଲା ହନୁମାଙ୍କଡ ଟା
ଟାଙ୍ଗିଆ କଟୁରୀ ଘଷି । ୧ ।
ପଟା ଆଣିଦେଲା ଗଧିଆ ବାପୁଡା
ଦୋଳି ବାନ୍ଧିଗଲା ଓଟ
ମୋବାଇଲ ଧରି ଚଗଲା ଠେକୁଆ
ଉଠାଇଲା ତା`ର ଫଟ ।
ବାଘର ଆଦେଶ ପାଇ,
ବଳିଆ କୁକୁର ପଟା ସଳଖିଲା
ଦୋଳି ପାଖେପାଖେ ଥାଇ । ୨ ।
ହରିଣ ଧରିଲା ଚାଉଳର ଡାଲା
ନଈରେ ଧୋଇବ ନେଇ
ପିଠଉ ବାଟିବ ଶିଆଳ ଜଗିଲା
ଶିଳ ଶିଳପୁଆ ଠାଇଁ ।
ସମ୍ବର, ଗୟଳ ବୁଲି,
ବଣ ଗୋଟାକରୁ କାଠ ଆଣିଦେଲେ
ଜାଳିବା ପାଇଁକି ଚୂଲୀ । ୩ ।
ତାଉଆ, ପାତିଆ ଯୋଗାଡିଲା ପୁଷି
ଚଞ୍ଚଳ କରିବ ପିଠା
ଭାଡିତଳେ ବସି ହାତୀ କରୁଥିଲା
ପାନ ମସଲାର ଚିଠା ।
ସବୁ ଚିଜ ହେଲା ଅଣା,
ଏତେକଥା ଏତେ ସଅଳ ଘଟିଲା
ମୂଷାକୁ ନଥିଲା ଜଣା । ୪ ।
ମନେମନେ ମୂଷା ବହୁତ ରାଗିଲା
ଭାବିଲା, `ମୁଁ ସିନା ସାନ
ତେଣୁ ମୋତେ ସବୁ ଅଣଦେଖା କଲେ
ଦେବି ତାଙ୍କୁ ଗୋଟେ ପାନ` ।
ଛପିଛପି ଗଛେ ଉଠି,
ଟିକିଟିକି କରି କାଟି ପକାଇଲା
ବନ୍ଧା ଯେତେ ରଶି ଗଣ୍ଠି । ୫ ।
ପଟୁଆର କରି ସବୁ ପଶୁଗଣ
ସିଂହ କୁ ଆଣିଲେ ଡାକି
ରାଜା ଆଗ ଖେଳ ଆରମ୍ଭ କରିଲେ
ଆଉ ଯେତେ ଯାହା ବାକି ।
ଦୋଳିରେ ଯତନେ ଚଢି,
ଥରେ ନବାହୁଣୁ ରଶି ଛିଡିଗଲା
ସିଂହ ଗଲା ତଳେପଡି । ୬ ।
କଚଡା ଖାଇଣ ଅଣ୍ଟାକୁ ସଳଖି
ଗର୍ଜନ-ତର୍ଜନ କରି
କମ୍ପାଇଲା ରାଗେ, ଯେତେ ପଶୁ ଥିଲେ
ଲୁଚିଗଲେ ଡରିମରି ।
ମୂଷା ଦେଖୁଥିଲା ମଜା,
ମିଳିମିଶି ରଜ ନପାଳିଲେ ବୋଲି
ପାଇଲେ ଏପରି ସଜ୍ଜା । ୭ ।

∎
ଶୁଶୁଡା,ଅନୁଗୋଳ
ମୋ - 7978087891