କବିତା

ବଣରାଇଜ କଥା

ଲେଖା : ଶ୍ରୀ କୁଞ୍ଜ ବିହାରୀ ସାହୁ

କୁକୁର ଦଳେ ଭୁକିଲେ ଭୋ..
ଥରିଲା ଗଞ୍ଜା ଦିହ
କଣ୍ଟାଝଣ୍ଟାରେ ଧାଉଛି ବେଗି
ତଳକୁ କରି ମୁହଁ ।

ବିଲୁଆ କଲା ହୁକେ..ହୋ ରଡ଼ି
ଆଖୁବାଡ଼ିରେ ପଶି,
ଜାଣିପାରିଲେ ଠେକୁଆମାନେ 
ପଳେଇଗଲେ ଖସି ।

ଗରଜିଦେଲା ଚିତାବାଘଟି
ଗଛ ଉହାଡ଼େ ଲୁଚି
ତରକା ହୋଇ ମାଈ ହରିଣ 
ସହଳେ ଗଲା ଘୁଞ୍ଚି । 

ନେଉଳ ଦେଖି ଚଗଲା ସାପ
ଟେକିଲା ତାର ଫଣା,
କୁଆଡ଼େ ଯିବ ପାଉନି ବାଟ
ହୋଇଲା ବାଟବଣା ।

ବଣଭିତରେ ରହନ୍ତି ପଶୁ
ଥରୁଟେ ରାଗିଗଲେ,
କେହି କାହାକୁ ନ ପାରି ବୁଝି
ମରାମରିରେ ମଲେ ।