ଆମ ଜେଜେ

ଲେଖା : ସୁଜିତ କୁମାର ମିଶ୍ର

ହାତେ ଧରି ବାଡି ଆକଟ କରନ୍ତି
ସକାଳରୁ ସଞ୍ଜ ଯାଏ,
ଅବୁଝା ହୋଇଲେ ଗାଳି ଦେଇ ସାରି
ଦୁଃଖ କରିଥାନ୍ତି ସିଏ ।

ଗୋଡ ତଳେ ବସି ଭୁଲ ମାଗୁ ତାଙ୍କୁ
ଧରି ଆମ ଦୁଇ କାନ,
ତାଙ୍କ ରାଗ ରୋଷ ଉଭେଇ ଯାଏଟି
ତୁଟେ ସବୁ ଅଭିମାନ ।

ସିଏ ଆମ ଜେଜେ ଘରର ମୁରବି
ସବୁକୁ ନିଅନ୍ତି ସହି,
ଅମାପ ସେନେହ ଶରଧା ତାଙ୍କର
ଆମ ବାଧା ନିଏ ଧୋଇ ।

ବଡ ବଡ ନିଶ ଆଖିରେ ଚଷମା
ଜେଜେଙ୍କ ଥନ୍ତଲା ପେଟ,
ଅଶୀ ବୟସେ ବି ହସରେ ଖୁସିରେ
ସହଜେ ଚାଲନ୍ତି ବାଟ ।

ପଢନ୍ତି ପୁରାଣ ଗୀତା ଭାଗବତ
ଗାଧୋଇ ସାରିବା ପରେ,
ନୀତିଶିକ୍ଷା କେତେ କହନ୍ତି ବୁଝାଇ
ମଜା ଗପ ମାଧ୍ୟମରେ ।

ଜେଜେମା କହନ୍ତି ତୁମ ଜେଜେ ପରା
ପରାଧୀନ ବେଳ ଲୋକ,
ତାଙ୍କ ଠାରେ ଦେଖୁ ଗାନ୍ଧୀ ଗୋପବନ୍ଧୁ
ନେତାଜୀଙ୍କ ନୀତି ଯାକ ।

ଆମ ଜେଜେ ପାଇଁ ଘରଟି ସତେକି
ଲାଗଇ ସରଗ ସମ
ସକଳେ ନମିବା ତାଙ୍କ ଚରଣରେ
ସେ ପରା ଦେବତା ଆମ ।

ଜନାର୍ଦ୍ଦନପୁର ଶାସନ
କେନ୍ଦୁଝର
୭୬୮୩୮୬୭୭୪୨