କୁନିପିଲା କାହ୍ନୁ

ଲେଖା : ପ୍ରଶାନ୍ତ କୁମାର ଦାଶ

କୁନିପିଲା କାହ୍ନୁ ଭାରି ଅମାନିଆ

ମାନେନାହିଁ କାହାକଥା
ଘରୁ ଲୁଚି ଲୁଚି ଯାଏ ଏଣେ ତେଣେ
ଘୂରଇ ମାଆଙ୍କ ମଥା ||

ଘରେ ଘରେ ପଶି ଚୋରାଇ ଖାଏସେ
କେତେଯେ ଲହୁଣୀ ସର
ତେନ୍ତୁଳିଛାଟରେ ମାଡ଼ଖାଏ କାହ୍ନୁ
ମାଆ ହାତୁ ବହୁଥର ||

ଜଙ୍ଗଲକୁ ଯାଇ ଚରାଏସେ ଗାଈ
ହୁଏ ଦେହ ଧୂଳିମଳି
ତା ଦେହକୁ ପୋଛି ମାଆ ଯଶୋମତି
କୋଳକୁ ନିଅନ୍ତି ତୋଳି ||

ଗୋପବାସୀଙ୍କର ପାଏ ସେ ଆଦର
ସେନେହ ଶରଧା ଗେଲ
ଫୁଟିଥିଲା କାହ୍ନୁ ଗୋପ କାନନରେ
ହେଇ ଏକ ସଜଫୁଲ ||

ସୁଦାମ ସୁବଳ ସଖା ସାଥେ ଖେଳେ
ଗହନ କାନନ କୋଳେ
ସାଥୀ ହେଇ ଚଢ଼ି ଗଛର ଡାଳରୁ
ମିଠା ଫଳ କୋଳି ତୋଳେ ||

କଂସ ବନ୍ଦୀଘରେ ଜନମ ନେଇ ସେ
ଆସିଥିଲା ଗୋପପୁର
ଗୋପୀ ଗୋପାଳଙ୍କୁ ଛାଡି ଚାଲିଗଲା
ଦିନେ ସେତ ବହୁଦୂର ||

ଡାକନ୍ତି ଯଶୋଦା ଫେରିଆ କାହ୍ନୁରେ
ଆରେ ମୋ ନୟନତାରା
ଆକାଶ ଛାତିର ତୁ ପୁନେଇଁଜହ୍ନ
ଶତ ବରଷାର ଧାରା ||

କୁନିପିଲା କାହ୍ନୁ କରିଥିଲା କେତେ
ଦୁଷ୍ଟ ଅସୁରଙ୍କୁ ନାଶ
କୁନି ପିଲା ନୁହେଁ ବିଶ୍ଵ କାରିଗର
ପୂଜିବା ତାକୁରେ ଆସ ||

କୁଞ୍ଜର -ସଙ୍ଗଳାଇ
ପିପିଲି -ପୁରୀ
ମୋବାଇଲ -୯୬୬୮୮୨୨୧୯୦