ଏଇ ଅଗଷ୍ଟରେ

ଲେଖା : ନୀଳମଣି ଚାନ୍ଦ

ଲୋକେ କହନ୍ତିରେ ଲୋକେ କହନ୍ତି
ଅଗଷ୍ଟ ମାସଟି ଏକତିରିଶିଆ
ଆସିଯାଏ  ଆଣି କେତେ ଜୟନ୍ତୀ ।

କିଛି କହନ୍ତିରେ କିଛି କହନ୍ତି
ଅଗଷ୍ଟରେ ପଡ଼େ କେତେ ପୁଣ୍ୟତିଥି
ସ୍ମୃତି ପଟେ କିଛି  ଜିଇଁ ରହନ୍ତି ।

ଜୟନ୍ତୀ କଥାରେ ଜୟନ୍ତୀ କଥା
ପାଞ୍ଚରେ ବକୁଳବନ ଦୁର୍ବାସା
ନୀଳକଣ୍ଠଙ୍କୁରେ ନୁଆଁଉ ମଥା।

ଅଗଷ୍ଟ ନଅରେ ଅଗଷ୍ଟ ନଅ
ଶ୍ରାବଣ ପୂର୍ଣ୍ଣିମା ସ୍ୱଭାବ କବିଙ୍କ
ଜୟନ୍ତୀ ପାଳିବ ପିଲାଏ କହ ।

ଛବିଶ ଅଗଷ୍ଟ ଆସିବ ଯେବେ
ସେବାର ପ୍ରତୀକ ମାଆ ଟେରେସାଙ୍କ
ଜୟନ୍ତୀ ସମସ୍ତେ ଭାବି ଯେ ନେବେ ।

ଅଗଷ୍ଟ ସାତରେ ଅଗଷ୍ଟ ସାତ
ବିଶ୍ୱକବି ରବୀନ୍ଦ୍ରଙ୍କ ପୁଣ୍ୟତିଥି
କରିଦେବାରେ ତାଙ୍କୁ ପ୍ରଣିପାତ ।

ସିଏ  ସ୍ୱାଧୀନତା ଦିବସ ଆଣେ
ପ୍ରତି ଭାରତୀୟ ପାଇଁ ତ  ଗରବ
ଅଗଷ୍ଟ ପନ୍ଦର  ଜାଣେ ମୁଁ ଜାଣେ।

∎
   ୨୭,ମନ୍ତ୍ର ମାନୋର,ଗୋଠପାଟଣା
ଭୁବନେଶ୍ୱର,ମୋ:୯୫୮୩୨୦୨୩୫୭