ଅଜାଙ୍କ ମଜା

ଲେଖା : କବିଜ୍ୟୋତି ନିରଞ୍ଜନ ପତି

ବର୍ଷା ଆସିଲାଣି ଘରକୁ ଯିବା,
ବାଟରୁ କିଣିକି ବେସନ ନେବା ।
ବରଷା ପାଗକୁ ପକୁଡ଼ି ମଜା,
ଖାଇବାକୁ ସଜ ହୋଇଲେ ଅଜା ।

ଅଦା ଲଙ୍କା ସହ ପିଆଜ କାଟି,
ପିଠୋଉ ରେ ଆଈ ଦେଲେତ ଫେଣ୍ଟି ।
ପକୁଡ଼ି ଭିତରେ ଲଙ୍କା ର ଖଣ୍ଡ,
ଚୋବେଇ ପୋଡ଼ିଲା ଅଜାଙ୍କ ତୁଣ୍ଡ ।

ହୁଉ ହାଆ ହୋଇ ଡେଇଁଲେ ଅଜା
ନାତୁଣୀ ଦେଖିଲା ଅଜାଙ୍କ ମଜା ।
କହିଲା ଚୋବାଅ ମଟର ଭଜା,
ଦୂର ହେବ ପାଟି ପୋଡ଼ାର ସଜା ।

ଟାଣୁଆ ମଟର ଦାନ୍ତରେ ଖାଇ,
ଭାଙ୍ଗି ଗଲା ଗୋଟେ ଆଘାତ ପାଇ ।
ସେଦିନୁ ପକୁଡ଼ି,ମଟର ଭଜା,
କେବେ ଖାଆନ୍ତିନି ଧଡ଼ିଆ ଅଜା ।
∎
ଗାନ୍ଧୀ ମାର୍ଗ, ଅନୁଗୋଳ
ମୋ-୯୯୩୮୧୩୩୫୫୯