ହେଇ ପରା ପୁଷି ଆସୁଛି

ଲେଖା : ସଂଗ୍ରାମ କେଶରୀ ପୃଷ୍ଟି

ଘୁଟୁଘୁଟୁ ଚଢ଼ି ବୁଲେଟ ଗାଡ଼ି
କିଏରେ ଇଆଡ଼େ ଆଉଚି ମାଡ଼ି
ହେଇ ପରା ପୁଷି ଆସୁଛି,
ଏକସିଲିଟର ମୋଡ଼ି ଦେଇ ସିଏ
ନିଶକୁ ଫୁଲାଇ ହସୁଛି ।।

ଚୁଉଁ ଚୁଉଁ କରି ଗାତୁଆ ମୂଷା
ପାଖରେ ମୂଷୀଟା ଖସର ଖସା
ଗାଡ଼ି ଆଗକୁ ସେ ଅଇଲା,
ଡ଼ାକ୍ତରଖାନାକୁ ନେଇଯା` ଲୋ ଟିକେ
ବଡ଼ ବିକଳରେ କହିଲା ।।

ଥୁରୁଥୁରୁ କରି ଥରୁଛି ମୂଷୀ
ଦେହରୁ ଝାଳ ତା` ପଡୁଛି ଖସି
ମନେ ଦୟାଭାବ ଜୁଟିଲା,
ଗାଡ଼ି ଅଟକାଇ ଦୁହିଁଙ୍କୁ ବସାଇ
ଆଗକୁ ସେ ପୁଣି ଛୁଟିଲା ।।

ବିଲେଇ ଗାଡ଼ିରେ ମୂଷାଙ୍କ ଯିବା
ଯିଏ ସେ ଦେଖିଲା ହୋଇଲା କାବା
ଏମିତି ହୁଏ କି ସତରେ,
ବିଲେଇ ଡରରେ ମୂଷା ତ ଛାନିଆଁ
ପଶିଯାଏ ପରା ଗାତରେ ।।

ଆସି ପହଞ୍ଚିଲେ ଡାକ୍ତରଖାନା
ପୁଷିନାନୀ କହେ, ହେଇଟି ଅନା
ଭିତରକୁ ଦୁହେଁ ଯିବ,
ଡାକ୍ତର ଦେଖାଇ ଓଷଦ ଲେଖାଇ
ମୋ ବାଟକୁ ଚାହିଁଥିବ ।।

ଘୁଟୁଘୁଟୁ ଚଢ଼ି ବୁଲେଟ ଗାଡ଼ି
ପୁଷି ଚାଲିଗଲା ଧୂଆଁକୁ ଛାଡ଼ି
କିଛି ବେଳ ପରେ ଅଇଲା,
ମୂଷା ଓ ମୂଷୀକୁ ସଙ୍ଗତେ ଘେନିଣ
ତା` ଘରେ ଯତନେ ଛାଡ଼ିଲା।।
∎
ଶିକ୍ଷକ , ପି ଏମ୍ ଶ୍ରୀ ସରକାରୀ ଉଚ୍ଚ ବିଦ୍ୟାଳୟ,
କିଶୋରନଗର , ପୋ - ରାଜ କିଶୋରନଗର
ଜି - ଅନୁଗୋଳ, ପିନ୍ - ୭୫୯୧୨୬
ମୋ –୯୪୩୭୫୪୭୧୪୬