ନୂଆ ବରଷ

ଲେଖା : ହରିହର ଶୁକ୍ଳ

ନୂଆ ବରଷ ତୁ -
ଖୁସି ନହବତ ବଜେଇ ଦେ`
ଅଭାବ କଷଣ ହଜେଇ ଦେ`
ଜନ ମାନସରୁ ଦୁଃଖ ଅମା ଟାଳି
ନିରାଶ ପରାଣେ ଆଶାଦୀପ ଜାଳି
ଧୂଳି ଧୂସରିତ ଧରଣୀ ବୁକୁରେ
ସରଗ ସୁଷମା ସଜେଇ ଦେ`
ସବୁରି ମନକୁ ମଜେଇ ଦେ`।

ନୂଆ ବରଷ ତୁ -
ମମତାର ଫୁଲ ଫୁଟେଇ ଦେ`
ଶରଧା-ସୁବାସ ଛୁଟେଇ ଦେ`
ଜାତି-ଧରମର ଭେଦାଭେଦ ଭାବ
ନ ପାଉ ମଣିଷ ମନତଳେ ଠାବ
ପର- ଆପଣାର ବିଚାରଧାରାକୁ
ସବୁରି ମନରୁ ତୁଟେଇ ଦେ`
ସଭିଙ୍କୁ ଏକାଠି ଜୁଟେଇ ଦେ`।

ନୂଆ ବରଷ ତୁ -
ନୂଆ ବାଟ ଗୋଟେ ବତେଇ ଦେ`
ସେବାରେ ସଭିଙ୍କୁ ମତେଇ ଦେ`
ଶାନ୍ତିର ମଧୁ ସଙ୍ଗୀତ ଗାଇ
ହୁଅନ୍ତୁ ସଭିଏଁ ଆନନ୍ଦରେ ବାଇ
ସତ୍ୟ, ଅହିଂସାକୁ ଆଦରିଛି ଯିଏ
ଅଚିରେ ତାହାକୁ ଜିତେଇ ଦେ`
କାଳ ତା` ସୁଖରେ ବିତେଇ ଦେ`।
∎
ବି-୧୦/୧୪୫,କେନ୍ଦ୍ରୀୟ ବିହାର
ତମାଣ୍ଡୋ,ଭୁବନେଶ୍ଵର-୨୮
ଫୋ:୯୮୬୮୮୦୫୯୯୬