କଥା ଦେଇଛି

ଲେଖା : କୀର୍ତ୍ତନ ସାହୁ

କଥା ଦେଇଛି ମୋ ମାଆକୁ
ନିଜ କାମ ମୁହିଁ
ନିଜେ ମୁଁ କରିବି
ଅରପି ଦେବିନି କାହାକୁ । 1

ବାପାଙ୍କୁ ମୁଁ କଥା ଦେଇଛି
ଭଲ ପାଠ ପଢ଼ି
ମଣିଷ ହୋଇବି
ପାଦ ତାଙ୍କ ଛୁଇଁ ନେଇଛି ।

କଥା ଦେଇଛି ମୁଁ ମାଟିକୁ
କଳୁଷିତ ଜମା
କରିବି ନାହିଁ ମୁଁ
କେବେ ହେଲେ ତାର ଛାତିକୁ ।

କଥା ଦେଇଛି ମୁଁ ଗଛକୁ
ଯତନ ତା ନେବି
ନଷ୍ଟ କରିବିନି
ଚାହିଁବିନି କେବେ ପଛକୁ ।

କଥା ଦେଇଛି ମୁଁ ଜଳକୁ
ଦୂଷିତ ହେବାକୁ
ଦେବିନି ଜମା ମୁଁ
ଖଟାଇ ମୋହର ବଳକୁ ।

କଥା ଦେଇଛି ମୋ ଦେଶକୁ
ତା ମାନ ମହତ
ସଦା ମୁଁ ରଖିବି
ସଜାଇ ମୋ ବୀର ବେଶକୁ ।
∎
ମିଶ୍ର କଲୋନୀ
ଶାଳପଡ଼ା , କେନ୍ଦୁଝର
ଦୂର ଭାଷ – ୯୪୩୮୪୧୪୭୦୧