ଉଡା ଜାହାଜରେ ଯିବି

ଲେଖା : ତନୟା ଦାସ ଗୋସ୍ୱାମୀ

ସ୍କୁଲରୁ ଫେରି ମାଆଙ୍କୁ କହିଲା
ଅତି ଶରଧାରେ ମିଲି ।
ମିସ୍ ଦେଇଛନ୍ତି ରଚନା ଗୋଟିଏ
ଲେଖିକି ଆଣିବ କାଲି ॥
ରଚନାଟି ହେଲା ଗାନ୍ଧୀଙ୍କ ଜୀବନୀ
ଯାହାର ସୁନ୍ଦର ହେବ ।
ଭାରତର ରାଜଧାନୀ ସେ ବୁଲିବ
ଉଡାଜାହାଜ ରେ ଯିବ ॥
ଉଡାଜାହାଜର କଥା ଶୁଣି ଦେଇ
ମାଆ ହେଲେ ତାର ଖୁସି ।
ସବୁକାମ ସାରି ମିଲି ପାଇଁ ସିଏ
ରଚନା ଲେଖିଲେ ବସି ॥
ଘଣ୍ଟା ଘଣ୍ଟା ଧରି ଗାନ୍ଧୀଙ୍କୁ ଭାବିଲେ
କିଛି ଲେଖି ହେଲା ନାହିଁ ।
ଦି ଚାରିଟା ଧାଡି ଲେଖୁ ଲେଖୁ ସିଏ
ରାତି ଗଲା ଏଣେ ପାହି ॥
ବିଛଣାରୁ ଉଠି ମିଲି ତ ଖୋଜିଲା
ରଚନାଟା ମାଆ କାହିଁ?
ଲାଜରେ କହିଲେ ଗାନ୍ଧୀଙ୍କ ବିଷୟ
ମୋତେ କିଛି ଜଣା ନାହିଁ ॥
ଗାନ୍ଧୀଙ୍କ ଜୀବନୀ ଜାଣି ନୁ ମାଆତୁ
କାନ୍ଦି କାନ୍ଦି କହେ ମିଲି ।
ରଚନା ଲେଖିବା ନୋହିଲା ମୋହର
ଯାଇ ପାରିବିନି ଦିଲ୍ଲୀ ॥
ମିଲି କାନ୍ଦ ଦେଖି ମାଆ ଦୁଃଖ କଲେ
ନିଜକୁ କରିଲେ ଦାୟୀ ।
ଏଣିକି ପଢିବେ ମହାପୁରୁଷଙ୍କ
ଜୀବନୀ ଉପରେ ବହି।
∎ ରାଧାକୃଷ୍ଣ ନଗର ,ଭୁବନେଶ୍ୱର।