ଆସ ମା ମମତାମୟୀ
ପ୍ରଶାନ୍ତ କୁମାର ଦାଶ
ନଭେମ୍ବର: ୨୦୨୬
Canonical: https://shishukishora.com/editions/2026-11/article-10.html

ଜହ୍ନତ ବିଭୋର ତାରାତ ବିଭୋର

ବିଭୋର ଆକାଶ ଛାତି

ହଟିଯାଏ ଗାଢ଼ ଅନ୍ଧାର ଜୋଚ୍ଛନା

ଝଲମଲ କରେ ରାତି ||



ନଈପଠା ଧାରେ କାଶତଣ୍ଡୀ ଭାଙ୍ଗେ

ଦେହର ଅଳସପଣ

ଗଛତ ଧରିଛି ଫୁଲ ଫଳ କୋଳି

ସୁନ୍ଦର ଦିଶୁଛି ଵଣ ||



ନୂଆ ଧାନକ୍ଷେତ ଦେଖି ଗାଏ ଗୀତ

ହିଡମୁଣ୍ଡେ ଵସି ଚାଷୀ

ଧଳାମେଘ ଖଣ୍ଡ ଆକାଶ ଛାତିରେ

ଦିନ ରାତି ଯାଏ ଭାସି ||



ମାଆଙ୍କର ଆଗମନେ ଶରତଯେ

ବଢାଏ ପ୍ରକୃତି ଶୋଭା

ବଗିଚା ଫୁଲରେ ବସେ ପ୍ରଜାପତି

ଫୁଲ ଦିଶେ ମନଲୋଭା ||



ଆସୁଛନ୍ତି ମାଆ ମେଢ଼ ମଣ୍ଡପରେ

ପୂଜାତ ପାଇବେ ବସି

ମମତାମୟୀଙ୍କ ଆଗମନ ଜାଣି

ଭକତ ଦେଲେଣି ହସି ||



ଜହ୍ନିଫୁଲ ଫୁଟି ଦିଶେ ଜକ ଜକ

ଦେଖି ମନ ଯାଏ ଲାଖି

କୁଆଁରୀ କନିଆ ଚାହିଁଛି ପୁନିଅଁ

ରାତିକି ଅତର ମାଖି ||



ଗଙ୍ଗଶିଉଳି ତା ବାସରେ ମୋହୁଛି

ମଣିଷ ପରାଣ ମନ

ଶରତ କରିଚି ସରସ ସୁନ୍ଦର

ନଈ ଝର ବିଲ ବନ ||