ଟିକି ଘର
କୀର୍ତ୍ତନ ସାହୁ
ନଭେମ୍ବର: ୨୦୨୬
Canonical: https://shishukishora.com/editions/2026-11/article-13.html

ମୋ ` ଟିକି ଘର ମୋତେ ବଢିଆ

ଖରା ଶୀତ ବର୍ଷା ହେଉ ଝଡିଆ

ଆହା କେଡ଼େ ମନ ଲୋଭା

କାନ୍ଥରେ ତାହାର

ଝୋଟି ଆଙ୍କି ଦେଲେ

ବଢ଼ି ଯାଏ ତାର ଶୋଭା ।



ଟିକି ଘର କଡେ ଡୁବି ଗଡିଆ

ମାଛ ଖେଳୁ ଥାନ୍ତି ଭାରି ବଢିଆ

ଭାରି ମଜା ମୋତେ ଲାଗେ

ମାଛ ଧରିବାକୁ

ରାନ୍ଧି ଖାଇବାକୁ

ମନରେ ସରାଗ ଜାଗେ ।



ଫୁଲ ବଗିଚାଟେ ଅଛି କଡ଼ରେ

କେତେ ଫୁଲ ଫୁଟେ ଛୋଟ ବଡରେ

ବାସନା ତ ଛୁଟି ଆସେ

ଯୋଉଠି ଥିଲେ ବି

ଯାହା କରୁଥିଲେ

ମହ ମହ ହୋଇ ବାସେ ।



ଏଇ ଟିକି ଘର ପ୍ରିୟ ଆମର

ଆସିଥାଏ ଏହା କେତେ କାମର

କୋଳେ ତା ଆଶରା ଦିଏ

ସୁଖରେ ଦୁଃଖରେ

ହସରେ କାନ୍ଦରେ

ଆପଣାର କରି ନିଏ ।