ଆମେ ଆଙ୍କିଦେବୁ ନୂଆ ଆଲୋକ
ଅନନ୍ତ କୁମାର ସେନାପତି    ।
ନଭେମ୍ବର: ୨୦୨୬
Canonical: https://shishukishora.com/editions/2026-11/article-22.html

ସୃଷ୍ଟି ହୋଇଛୁ ଏ ଧରା ପୃଷ୍ଠରେ

ଅମୃତ ତୋଳି ପାରିବୁ ଦିନେ,

ଚମକୁ ବିଜୁଳି ଆସୁ ବଜ୍ର ବାଡ଼ି

ପଛେଇବୁ ନାହିଁ ଆମ ଜୀବନେ    ।



ଆମେ ଆଙ୍କିଦେବୁ ଧରଣୀ ବୁକୁରେ

ନୂଆ ସମ୍ଭାବନା, ସୃଷ୍ଟି ଧାରା,

ପୁଲକି ଉଠିବ ଦଶ ଦିଶ ଦେଶ

ଚମକି ଉଠିବ ବିଶ୍ୱ ସାରା     ।



ଦୁରେଇ ପାରିବୁ ଅମା ଅନ୍ଧକାର

ଜ୍ଞାନ ର ଦୀପାଳି ଦେବୁ ଯେ ଜାଳି,

ଶସ୍ୟ ଶ୍ୟାମଳା ହୋଇବ ଏ ମାଟି

ମନ ମୁନ ଆମ ଦେବୁ ଯେ ଢ଼ାଳି       ।



ପ୍ରତି ସକାଳ ରେ ସୁନା ଫୁଲ ହୋଇ

ଫୁଟିବୁ ପାଖୁଡା କେତେ ମେଲି,

ସୂରୁଜ, ଆକାଶ ଦେଖିବୁ ନୟନେ

ପବନରେ ନିତି ଝୁଲି ଝୁଲି         ।



ମନ ଟିକି ସିନା ହୃଦୟେ ଆମର

ଭରିଛି ଅନେକ ନୂଆ ସପନ,

ସିନେହ, ଆଦର ଲୋଡ଼ା ଆମ ପାଇଁ

ଆମେ ଅଟୁ ପରା ଦେଶ ରତନ      ।



ସବୁରି ଓଠରେ ଭରିଦେବୁ ହସ

ସତ୍ୟ ପଥରେ ଯାଇ,

ଭଲ ପଥେ ଯାଇ କରମ କରିଲେ

ସାହା ହୋଇଥିବେ ସାଇଁ           ।