କିଛି ଭଲ କାମ କରିବା
ଶେଖର କୁମାର ସ୍ବାଇଁ
ନଭେମ୍ବର: ୨୦୨୬
Canonical: https://shishukishora.com/editions/2026-11/article-28.html

ସକାଳ ହେଲାଣି ଚାଲ ସାଙ୍ଗ ସାଥି

ଯିବା ବୁଲିବାକୁ ପଡିଆ,

ପଡିଆ ପାଖରେ ଅଛି ପାଖା ପାଖି 

ଛୋଟ ଗୋଟେ କୁନି ଗଡିଆ ।



କୁନି ଗଡିଆର ହୁଡ଼ାରେ ଲାଗିଛି

ଆମ୍ବ, ଜାମୁଡୋଳ ନଡ଼ିଆ,

ମିଳିମିଶି କରି ଖାଇବା ସଭିଏଁ

ଲାଗିବ ପାଟିକୁ ବଢିଆ ।



ସକାଳୁ ସକାଳୁ ବୁଲିଗଲେ ଥରେ

ଦେହକୁ ଲାଗିବ ଆରାମ,

ଖେଳ କୁଦ କରି ଫେରିବା ଘରକୁ

ଶରୀରକୁ ଦେବା ବିରାମ ।



ପାଠ ପଢା ସାଥେ ଖେଳ କୁଦ ନିତି 

ଦେହକୁ ରଖିବ ନିରୋଗ,

ମୁକ୍ତ ଅମ୍ଳଜାନ ଦେହକୁ ମିଳିବ

ମନଟି ରହିବ ସରାଗ ।



ଆଜି ରବିବାର ଇସ୍କୁଲ ଯିବାନି 

କିଛି ଭଲ କାମ କରିବା,

ଖାଲ ଢିପ ରାସ୍ତା ସମତୁଲ ପାଇଁ 

କୋଦାଳ ଶାବଳ ଧରିବା ।



ଆସ ସାଙ୍ଗ ସାଥୀ ଭଲ କାମ ଆମେ

ଏବେ ଠାରୁ କରି ଶିଖିବା,

ପାଠ ପଢ଼ା ଆଉ ଖେଳ କୁଦ ସହ

ଗାଆଁ ନାଆଁ ଟେକ ରଖିବା ।