ଆସିଲା ହାତୀ

ଲେଖା : ତନୁଶ୍ରୀ ମହାନ୍ତି

ଆସିଲା ହାତୀ ଫୁଲାଇ ଛାତି
ପାଦ ପକାଇ ଧୀରେ।
କୁକୁର ଦଳ ହୋଇ ବିକଳ
ଲୁଚିଲେ ଯାଇ ଦୂରେ ॥
କିଏ ସେ ଏଡେ ବିରାଟ ଜୀବ
କାନଟା କୁଲା ପରି ।
ବୋବାଉ ନାହିଁ ଅନାଉ ନାହିଁ
ଦେହ ପାହାଡ ସରି ॥
ଶୁଣ୍ଢ ଉଠେଇ ଲାଞ୍ଜ ହଲେଇ
ଦାନ୍ତ ଦେଖାଏ ହାତୀ ।
କୁକୁର ଗୋଟେ ଭୁକିଲା ଧୀରେ
ମନରେ ରଖି ଭୀତି ॥
ସବୁ କୁକୁର ଜବାବ ଦେଲେ
ଭୋ ଭୋ କଲେ ପାଟି ।
ବାହାରି ଆସି ଆଢୁଆଳରୁ
ରାସ୍ତାରେ ଗଲେ ଜୁଟି॥
କିଏ ସେ ଭୁକେ କାହିଁକି ଭୁକେ
କାହିଁକି ଭୋ ଭୋ କରେ ।
ହାତୀ କରେନା ଖାତିର ଜମା
ଆଗକୁ ମାଡି ଚାଲେ ॥
∎