ଅଜାଙ୍କ ନିଶ

ଲେଖା : ସ୍ଵାତୀ ମହାନ୍ତି

ଅଜାଙ୍କର ଥିଲା ନିଶ,
ସେ ନିଶ ଦେଖିଲେ ନାତି ନାତୁଣୀ ଏ
ରୋକି ପାରନ୍ତିନି ହସ ।
ରାଜାଙ୍କର ନିଶ ପରି,
ଗୋଟାଏ ପଟ ତ ଉପରକୁ ଉଠି
ଦିଶେ ଯେହ୍ନେ ତରବାରୀ ।
ଆରପଟ ଟା ଦୁର୍ବଳ,
ତଳକୁ ଝୁଲି କି ପଡିଛି ଯେମିତି
ବରଗଛର ଓହଳ ।
ଲୋକେ ପଚାରନ୍ତି, ଅଜା !
ଏମିତିକା ନିଶ ରଖିଛ କାହିଁକି
ଦେଖିବାକୁ ଲାଗେ ମଜା ।
ଅଜା କଲେ ଟିକେ ରୋଷ,
କହିଲେ ନାତିଏ, ବୁଝି ପାରୁ ନାହଁ
ଏ ନିଶର ଇତିହାସ ।
ମୋ ପୂର୍ବ ପୁରୁଷ ବୀର,
ଥିଲେ ବୋଲି ମୋର ନିଶ ଟେକି ଅଛି
ଗୋଟେ ପଟେ ତାର ଶିର ।
ଏବେକୁ ନାହିଁ ସେ ବଳ,
ସେଇଥି ପାଇଁ କି ଆରପଟ ନିଶ
ହୋଇଗଲା ଭଙ୍ଗା ଡାଳ ।