କବିତା
ଆସ ମା ମମତାମୟୀ
ଜହ୍ନତ ବିଭୋର ତାରାତ ବିଭୋର
ବିଭୋର ଆକାଶ ଛାତି
ହଟିଯାଏ ଗାଢ଼ ଅନ୍ଧାର ଜୋଚ୍ଛନା
ଝଲମଲ କରେ ରାତି ||
ନଈପଠା ଧାରେ କାଶତଣ୍ଡୀ ଭାଙ୍ଗେ
ଦେହର ଅଳସପଣ
ଗଛତ ଧରିଛି ଫୁଲ ଫଳ କୋଳି
ସୁନ୍ଦର ଦିଶୁଛି ଵଣ ||
ନୂଆ ଧାନକ୍ଷେତ ଦେଖି ଗାଏ ଗୀତ
ହିଡମୁଣ୍ଡେ ଵସି ଚାଷୀ
ଧଳାମେଘ ଖଣ୍ଡ ଆକାଶ ଛାତିରେ
ଦିନ ରାତି ଯାଏ ଭାସି ||
ମାଆଙ୍କର ଆଗମନେ ଶରତଯେ
ବଢାଏ ପ୍ରକୃତି ଶୋଭା
ବଗିଚା ଫୁଲରେ ବସେ ପ୍ରଜାପତି
ଫୁଲ ଦିଶେ ମନଲୋଭା ||
ଆସୁଛନ୍ତି ମାଆ ମେଢ଼ ମଣ୍ଡପରେ
ପୂଜାତ ପାଇବେ ବସି
ମମତାମୟୀଙ୍କ ଆଗମନ ଜାଣି
ଭକତ ଦେଲେଣି ହସି ||
ଜହ୍ନିଫୁଲ ଫୁଟି ଦିଶେ ଜକ ଜକ
ଦେଖି ମନ ଯାଏ ଲାଖି
କୁଆଁରୀ କନିଆ ଚାହିଁଛି ପୁନିଅଁ
ରାତିକି ଅତର ମାଖି ||
ଗଙ୍ଗଶିଉଳି ତା ବାସରେ ମୋହୁଛି
ମଣିଷ ପରାଣ ମନ
ଶରତ କରିଚି ସରସ ସୁନ୍ଦର
ନଈ ଝର ବିଲ ବନ ||